【Day 28】
本來想講講阿爾巴尼亞歷史，但琴晚同hostel既主人傾完計後，我決定轉topic。
因為地理位置既優勢，阿爾巴尼亞一直都係兵家必爭之地。一次二次大戰後，國家已經陷於經濟低迷既局面，差唔多所有房屋都被入侵國破壞，(所以即使係首都Tirana都無咩歷史建築物)再加上冷戰時期阿爾巴尼亞為社會主義國家，又封鎖自己令到國家更加孤立無援。所以到而家阿爾巴尼亞都處於一個超低水平既GDP產值。
你以為一個咁窮既國家一定會成日發生搶劫事件，主人話無可否認曾經阿爾巴尼亞既黑社會好倡狂，但已經係過去既事。
對遊客黎講，呢度我覺得甚至比中國更加安全。可能呢度既亞洲遊客唔多，始終唔太多人認識呢個地方，所以當你行出去，沿途數以N計既人都會望一望你。如果你選擇戰佢地有眼神接觸，佢地一定會報以一笑。
琴日走到一個當地人既市集，我感覺到自己好似變左動物園入面俾人觀賞既動物，唔同既係周圍既人都會向你點頭笑，又可能當地人科技無咁發達，每次見到我既相機都會講photo photo。雖然佢地唔太識講英文，但其實都明白當中含意。因此，我就由動物變為攝影師，被人圍觀既攝影師。不過當見到佢地睇番自己張相既開心樣，心入面突然有種莫名既感觸。
對於我而言，係阿爾巴尼亞我不過是其中一個過客，但可以用數分鐘時間令當地人感到快樂，呢樣野係物質上係比較唔到。
佢地係窮，但勝在知足。正如hostel主人講，連當地人都覺得阿爾巴尼亞歷史好複雜，自己生於呢度都好難消化國家既過去，但卻無後悔生於阿爾巴尼亞，因為人們間總有無形既團結感。
Blog：http://backpackersopoor.blogspot.hk/
U Blog:http://blog.ulifestyle.com.hk/blogger/backpackersopoor/
Search